Imivugo

 

Nshuti muvandimwe, wari warabuze aho wakura utugambo twiza two kubwira uwo wihebeye! Humura tuza kuko igisubizo cyabonetse! Nta masuka ncura ariko nzi neza ko wifashishije utu dufuni wahinga ukeza!!!!!!!!!!

Agasimbi
 

Nihoreze agasimbi
Basahuye abasenzi
Umunsi ingoma-nyamunsi
Yimika abasogosi
Bagasakiza Gasabo
Ngo bashyire ibisiga.

Nihoreze agasimbi
Kasaritse agahinda
Kazanywe n'amahindu
Yiteretse mu Rwanda
Akarwambika urwamba
N'ibihumbi by'intumbi.

Nihoreze agasimbi
Kabuze imena konse
Kabura cya kiraro
Cy'inyana z'imikondo
Basangiye ibere.

Nihoreze agasimbi
Kongere gasusuruke
Kansekere ngasange
Nsingize ako kanyange
Nkite akanyana kanjye.

Yaramwise umusaza
Waduhaye iribagiza
Ngo abazaribaririza
Babe bazi ko ihogoza
Barihonga inyana ijana.

Agukundiye Simbi
Akagutereka urugwiro
Akaguterekera amaso
Ukamuterekaho ayawe
Ukitegereza ingingo
N'ubugondo bw'imanzi
Zurira intege zombi,
Ntumpakanye ndabizi
Bwacya uri mu marembo
Urongoye umunani
W'amashashi y'inyambo.

Nimusizane bwangu
Mumusangane ubwira
Mumusige urugwiro
Mugasumbe agahinda
Kamusenyera inkingi
N'igisenge cy'inyumba
Kamusumbanya wese
Gashyugumbwa kumwesa.

Nimuseruke Makombe
N'amakuza ibihumbi
Mugasumire cyane
Ako kene-nyamunsi
Kaboneranye u Rwanda
Mugahindure intere
Kabuyere burundu
Ko kabura ibibondo.

Mumucire umugara
Mumutahire neza
Muririmba inka nziza
Mu mudiho w'intore
Za Nkubitoyimanzi.

Muri hehe se nyange
Z'amagaju y'abari
N'ibikaka by'amariza
Ngo musange iyi nyambo
Muyihimbire utuntu
Muyitere udutwenge
Muyikenyeze umushanana
Ikarage umushayayo
By'amashashi yashibutse
Kuri rya shami ryiza?

Nimumporeze agasimbi
Kadasarara ngasenya;
Niba mutansanze
Ngo dusumbe ibisambo
Tugashyire urukundo
Ndabasarana mba mbanga!
Kandi nzi ko bibaye
Mwasoroma agahinda!

Nkundira ihangane
Wongere useke Simbi
Nikunde ngusanga
Ndangamiye inyenyeri
Zisuka mugatwenge
Kizihiye uruhanga
Rw'amaso adasumbwa.

Nkundira useke Simbi
Nongere nseke nanjye
Nuzure ibyishimo
Nizihiwe n'isura
Y'Umuhongerwanyambo.by M.willy

 

 

IBYO SI UMUCO!

 

 

Kera uwuje ubwema yavunaga abaniha

Agahendahenda abahogoye ntawe aheje

Ntahirarahire guhinyura igihango yihanzeho

Ngo amahano adahombokera aho atetse

Urwagihanga rukahahombera kizira!

 

None ubu umjinya n’impekenya murabikenyera

Ikinyoma murakijinyika boshye urujigo

Murajindirana ababagana mwiteye ijeki

Murahonyora ab’inkehwe nkabikebeye

Muraha Nyarubwana abana banagana

Muragaburira imisega ba sokuru baguye isari

Muratura umubi w’imitsi ya ba Nyakujya

Ntimubajyenere n’inogo bataranogoka

Ibyo si umuco!

Si umuco kwicarira abo musangiye umwuka

Isi muyisangiye nabo bene Data

Mwibatetereza bataguza badatemba

Mwebwe uwayihanze yasize mubisajye

Nimusagurire abasanze mukonoje

Mukamure amatama yasaritswe na Bwaki

Mwegure imisatsi yahushwe nibura rya VITAMINI

Mugurire imbago ibicumba

Mugirire imbabare akababyi

Murabere ababyeyi imfubyi

Mubere abafasha abapfakazi

Murirengagize kunena abanagana

Mwineguza amazuru aho inzara iri

Mwe imyenda ntikibakwira irenda guturika

Abandi barashumika ho imishumi ngo itagwa

Bamwe baravuvuka kubera kubura amavuta

Abandi barwaye imitima kubera ibinure

Hari abasigaranye ikiro kimwe kubera inzara

Abandi bahatirwa amasiporo ngo bananuke

Mbega ni byinshi navuga kuri iri rutana

Ariko ikiruta ikindi ni ki !

 

Tugaruke k’umuco waducuze

Umurage abakurambere baturaze

Tumenye abadukeneye tubavune

Duharanire kureshya nabo bavandimwe

Ntashiti umuco uzongera uganze

Ababaye bacu  bongere baseke

Abamugaye bashinge bakomeze

Imfubyi zacu zikire ubutabere

Ab’iminsi yanze gusekera bake

Bagorororoke abaheswe n’amateka

Umushyitsi w’inzara ucike mubiremwa

Abadafite bacike kurunguruka

Ahubwo bicarane namwe mubirori

Ntibitwe abavumbyi bitwe abavandimwe

Umwaga ucike tube bamwe mubumwe

Tugumye dusangire urugendo rujya iyo tujya

Ntawusigara kubwintegenke afite

Nuwo mutanze kugerayo

Ntimuhezeyo amaso muyanage n’inyuma

Nguko uko abantu batera imbere

 

 

                               TWAHIRWA JMV

                                    S.F.B CULTURE TROUP

                                     MANAGEMENT

 

                                Tél :03616995

                                  E-mail :twahirwajmv@yahoo.f